سوندىقتان «Dos.Community» قورى, «شەۆرون» كومپانياسى مەن Steppe&World باسپا ءۇيى بىرىگىپ, «تىڭ تاجىريبەلەر» اتتى جيناقتى جارىققا شىعارىپ وتىر.
الماتىداعى «Narxoz» بيزنەس مەكتەبىندە وتكەن كىتاپتىڭ تۇساۋكەسەرىنە قوعام مۇقتاجدىعى مەن الەۋمەتتىك ماسەلەلەرگە بەي-جاي قارامايتىن, ناقتى جوبالاردى قولعا الىپ, قوعامدى جاقسى جاعىنا جەتەلەگەن ادامدار جينالدى.
«تىڭ تاجىريبەلەر» جيناعى – 5 جىل بويى قازاقستاندا جۇزەگە اسىرىلعان 25 الەۋمەتتىك باستامادان تۇراتىن اۋقىمدى زەرتتەۋلەر. وسىناۋ جيناق ومىرلىك سۇرانىستان, ماڭىزى بار ماسەلەلەردى شەشۋ تالاپتارىنان تۋدى دەسەك تە بولادى. قازىر جۇرتقا كەرەگى – سەنىمگە كىرگەن, باقىلاۋدان وتكەن ناقتى باستامالا مەن ناقتى جوبالار.
كىتاپتىڭ گەوگرافيالىق اۋقىمى دا كەڭ. جيناققا قازاقستاننىڭ ءار ايماعىنداعى ءبىرىن ءبىرى قايتالاي بەرمەيتىن, ءوز ەرەكشەلىكتەرى بار 25 جوبا ەنسە, ونىڭ ىشىندە-شاعىن قاۋىمداستىقتاردان باستاپ ۇلتتىق باعدارلامالار دا تابىلادى. تاقىرىپتار دا سان قىرلى الەۋمەتتىك ماسەلەلەردى قامتيدى.
بارلىق جوبالاردى باستى قۇندىلى دا كەيىپكەرلەرى دە – ادام, كومەككە مۇقتاج جاندار. جيناققا كىرگەن ءاربىر تاجىريبە – اشىق پروتسەستەردىڭ, تەڭ قۇقىلى كوزقاراستار مەن ادامدارعا دەگەن قۇرمەتتىڭ ۇلگىسى.
جاڭا جيناقتىڭ ەرەكشەلىگى مىناداي: كافە-ميدراش فورماتىندا وتكەن تۇساۋكەسەر «داستارحانىنا» جينالعاندار الدىمەن «اس ءمازىرى» رەتىندە جوبالاردىڭ اتاۋلارىمەن تانىسىپ شىقتى. «داياشىلار» «تىسكەباسار» رەتىندە يدەيالار مەن ۇزىك-ۇزىك ويلاردى, شەشىمدەر مەن ماسەلەلەردى ۇسىندى. ال قاتىسۋشىلار بۇل قانداي الەۋمەتتىك جوبا ەكەنىن بولجاۋى ءتيىس ەدى.
وسىدان كەيىن ورتاعا «باس تاباق» كەلدى. بۇل – جيناقتىڭ قىسقا مازمۇنى مەن جوبانىڭ ءمانى تۋرالى قىسقا ماتىندەر. ياعني, الەۋمەتتىك باستامالار كىمدەر جانە نە ءۇشىن جاسالدى دەگەن ساۋالدارعا جاۋاپ. ناتيجەسى نەندەي بولدى, قوعامداعى قانداي ماسەلەنى شەشۋگە سەپتەستى دەگەندى مەڭزەيدى.
مىسالى, بۇل ارادا ەرەكشە بالا ءوسىرىپ وتىرعانداردى قولدايتىن «ماما پرو», ء«اربىر بالا مەكتەپكە بارۋعا لايىقتى», «سابيلەرگە ءومىر سىيلا», «فەتالدى حيرۋرگيا», «مىڭ بالا» وليمپياداسى سياقتى جوبالاردى اتاپ وتۋگە بولادى.
ماسەلەن, ەلىمىزدىڭ مەديتسينالىق قاۋىمداستىعىن ەلەڭ ەتكىزگەن فەتالدى حيرۋرگيانى الايىق. وتاندىق دارىگەرلەرىمىز وسىنداي جوبالاردىڭ ارقاسىندا قۇرساقتا, اناسىنىڭ جاتىرىنا جاتقان شارانانىڭ دەنساۋلىعىنداعى كەمشىلىكتى تۇزەتە وپەراتسيالاردى جاساۋعا قول جەتكىزىپ وتىر.
سول سياقتى ITeachMe قوعامدىق قورى جۇزەگە اسىرعان ITMlab جوباسى – مۇمكىندىگى شەكتەۋلى جانداردىڭ ءومىرىن وڭايلاتۋعا كومەكتەسەتىن يننوۆاتسيالىق شەشىمدەر, IT-ونىمدەر مەن وڭالتۋ قۇرالدارىن جاساۋدى كوزدەيتىن ەرەكشە ستارتاپ-ينكۋباتور.
بۇگىندە ەلىمىزدە ءبىلىم بەرۋ سالاسىنداعى تەڭسىزدىكتى ەڭسەرۋگە باعىتتالعان Teach for Qazaqstan (TFQ) سونداي باستامالاردىڭ جارقىن ۇلگىسى.
كىتاپتىڭ تۇساۋكسەرىندە «شەۆرون» كومپانياسىنىڭ الەۋمەتتىك ينۆەستيتسيالار جونىندەگى كەڭەسشىسى لەيلا ايتمۇحانوۆا: «وسى جيناق ارقىلى جىلدى تاماشا قورىتىندىلادىق دەسەك تە بولادى. وتكەن جىلدىڭ سوڭىندا ەلىمىزدە الەۋمەتتىك باستامالاردى ناسيحاتتايتىن, كورسەتەتىن ەشقانداي جيناق جوق ەكەندىگىن ويلاعان ەدىك. كوبىنەسە شەت ەلدىك تاجىريبەلەرگە سۇيەنىپ, سىلتەمە جاساپ كەلدىك. ولاردا مۇنداي كىتاپتار مەن ماتەريالدار كوپ. ءدال وسى كەزدە «Dos.Community» قورىنىڭ جەتەكشىسى اينۇر ايمۇرزينامەن سويلەسە باستادىق. ويتكەنى ولاردا ۇكىمەتتىك ەمەس ۇيىمداردى (ۇەۇ) باسقارۋدا الەۋمەتتىك مەنەدجمەنت تاجىريبەسى بار بولاتىن. بىزدە سول كەزدە يدەيا پايدا بولىپ, قاڭتار ايىندا وسى جوبانى باستاعاندا بىردەن مىقتى الەۋمەتتىك زەرتتەۋشىلەر, سوتسيولوگتار, ساراپشىلار ءۇن قاتىپ, ساراپشىلار مەن زەرتتەۋشىلەر توبى قۇرىلدى. باسىندا جوبانى ۇزاق تالقىلاپ, بۇل بايقاۋ تۇرىندە ەمەس, اشىق ىرىكتەۋ بولسىن دەگەن شەشىمگە كەلدىك.
ال جوبا بارىسىندا 700-دەن استام ۇسىنىس پەن ءوتىنىم قابىلدانىپ, ونىڭ 195-ءى ىرىكتەلىپ, 50 جوبا جارتىلاي فينالعا ىلىكتى. وسىلاردىڭ ىشىنەن جەتى ءتۇرلى سىناقتان وتكەن 25 كەيس تاڭدالىندى. ءوز كەزەگىندە ساراپشىلار 25 جوبا تۋرالى كەڭ سۇحباتتار, زەرتتەۋلەر جۇرگىزدى. بۇل جيناق ءجاي عانا مالىمەتتەر, تاجىريبەلەر مەن ناتيجەلەر جانە ونى كىمدەر جاساعانى جايلى عانا ەمەس. بۇل – ناعىز ادامگەرشىلىكتى دارىپتەيتىن وقيعالار. بايقاساڭىز, جوبادا «ۇزدىك» دەگەن ءسوز جوق, تەك جاقسى تاجىريبەلەرگە سۇيەندىك. ەشقانداي تالاپ, شاعىم جوق بولعاندىقتان دا جيناقتى «تىڭ تاجىريبەلەر» دەپ اتادىق. ءوز كەزەگىندە «Dos.Community» قورى ارناۋلى سايت قۇردى – https://goodpractices.kz. قولىمىزعا تيگەن جيناق كەلەشەكتە مەكتەپتەر مەن ۋنيۆەرسيتتەتتەرگە تاراتىلىپ, ءوزىمىزدىڭ قازاقستاندىق كەيستەردىڭ مىسالىنا اينالادى», دەيدى.
سونىمەن كافە-ميدراش فورماتىندا وتكەن كەزدەسۋ كەرى بايلانىس تۇرىندە اياقتالىپ, جيناقتىڭ تۇساۋكەسەرىنە قاتىسۋشىلار نەنى بىلگەنىن, قانداي اسەر العاندارى تۋرالى ويلارى مەن ۇسىنىستارىن ورتاعا سالدى.
«جيناققا ءبىزدىڭ ەڭ العاشقى زەرتتەۋلەرىمىز ەنىپ وتىر. جوباعا تارتىلعان 5 زەرتتەۋشى مەن 3 ساراپشى جەتى ءتۇرلى ولشەممەن ءاربىر جوبانىڭ قانشالىقتى ءماندى, قانداي ماسەلەلەر مەن سۇراقتاردى شەشە الاتىنىن قاراستىردى. بۇل جيناققا 25 تىڭ تاجىريبە ىلىكتى. بىراق الداعى ۋاقىتتا جيناققا كىرمەگەن جوبالار ءوز ۇسىنىستارىن بەرە الادى. باق پەن الەۋمەتتىك جەلىلەردەن ەلىمىزدەگى جوبالاردىڭ قانشالىقتى ماڭىزدى ەكەندىگى بايقاپ وتىرۋعا بولادى. سوندىقتان جۇمىستاردى جالعاستىرا بەرۋ قاجەت دەگەن ويدامىن. ويتكەنى, ەلىمىزدە قايىرىمدىلىق قورلارى مەن اكتسيالارىنا قاتىستى داۋلى, كەلەڭسىز وقيعالار بار. سوندىقتان تۇراقتى تۇردە الەۋمەتتىك جوبالارمەن ادامداردىڭ ارەكەتىنىڭ كۇمانسىز ءارى قولداۋعا دا يە بولعانى ءجون. جانە ولارعا مىسال, ۇلگى بولاتىنداي وسىنداي زەرتتەۋلەر وتە قاجەت», دەيدى «Dos.Community» جەكەمەنشىك قورىنىڭ جەتەكشىسى اينۇر ايمۇرزينا.
